上一页

ⓘ 澳洲中國留學生 ,又叫 中國在澳留學生 ,一般係指由中國大陸去澳洲讀書嘅學生。根據2020年上半年嘅統計數據,澳洲共有17萬來自中國嘅留學生持學生簽證,佔留學生總數超過 ..




                                     

ⓘ 澳洲中國留學生

澳洲中國留學生 ,又叫 中國在澳留學生 ,一般係指由中國大陸去澳洲讀書嘅學生。根據2020年上半年嘅統計數據,澳洲共有17萬來自中國嘅留學生持學生簽證,佔留學生總數超過四分之一。亦因為呢排群體幾龐大,從而引申咗唔少嘅議題同商機。

                                     

1. 以服務中國在澳留學生為主嘅公司

由於呢批學生為數唔少,所以亦衍生咗一啲以呢班學生,同埋中國來到澳洲新移民為主要客人嘅公司,例如喺2010年創立,2017年畀騰訊收購咗嘅今日傳媒集團。另外,服務呢啲學生嘅移民業務或者補習業務亦有一定市場,例如,領航教育同埋唐寧教育就係澳洲其中兩間提供呢類型服務嘅機構。而領航教育亦設有移民公司「Monkey King」。

                                     

2.1. 相關議題 融入澳洲當地問題

有部份人覺得,中國內地留學生喺澳洲講中文、睇中文節目,成為咗佢哋融入本地社會嘅絆腳石。有啲中國內地留學生甚至唔會同本地學生來往。有啲中國內地生接受就話,自己唔鍾意逃離個舒適區,格硬融入只會係妥協,或者自己差一啲勇氣。蒙納什大學傳媒電影新聞學院高級講師顧鑫就評論,西方社會比起中國自由,唔會捉住學生隻手令佢哋成長,而要學生主動向學校表達所需嘅幫助,亦因為咁樣,唔可以話大學唔關心學生。

                                     

2.2. 相關議題 學術誠信問題

中國在澳留學生嘅龐大數量,亦衍生咗功課請槍,論文代寫嘅產業。其中一間最大嘅機構係喺中國成立,喺包括澳洲在內十幾個國家都有業務嘅美倫教育。

不過,澳洲廣播公司(ABC)喺2019年12月嘅一篇報道,就睇到更多呢啲寫手,其實係中國內地嘅學生,好多都唔屬於任何機構,而係直接同顧客學生接觸。一啲澳洲大學嘅廁格入面,會見到唔少論文代寫嘅中文小廣告貼喺門上面。另外,有受訪學生亦都話,佢哋認識根本個個都有用,只係次數唔同,呢樣嘢係留學生嘅文化。

因應呢個問題,澳洲聯邦教育部丹 鄧肯(Dan Tehan)2019年4月就曾經警告大力打擊代寫服務,服務提供者會面臨兩年有期徒刑或者最高21萬澳元嘅罰款。而澳大利亞高校聯盟(Universities Australia)副總裁安娜-瑪麗 蘭斯頓(Anne-Marie Lansdown)亦曾經表示,佢哋會幫助政府完善立法。

                                     

2.3. 相關議題 干預澳洲言論集會自由

由於中國內地學生同澳洲喺一啲價值觀嘅唔同,所以同本地人有時會發生衝突,部分中國内地學生甚至會對本地人同埋其他群體圍堵襲擊。2020年11月,一份由澳洲商業議會亞洲學會、普華永道會計師樓(PwC)同雪梨大學合作完成嘅報告就指中國留學生過多,阻礙自由辯論同埋學術誠信。

喺2017年8月,紐卡素大學一名印度裔講師被指喺課堂同埋測驗入面,將台灣同香港稱為國家(country),引起中國留學生不滿,事件亦被今日傳媒集團旗下嘅今日悉尼大篇幅煽動,同埋引起咗澳洲其他媒體對於呢啲中國留學生同埋中國大使館損害校園言論自由嘅關注。

喺香港反送中運動期間,有一啲當地嘅香港人同埋本地人都喺澳洲舉行咗唔少聲援活動,但係中國內地學生對運動就普遍持負面態度。例如喺2019年7月24號,昆士蘭大學就有學生舉行集會靜坐聲援香港人,要求香港政府撤回修訂條例、成立獨立委員會調查六至七月期間香港警方處理集會示威嘅手法,譴責元朗襲擊事件,又要求北京政府唔好再打壓新疆維吾爾族人權。佢哋又設置「流動連儂牆」畀途徑學生同埋民眾留下心聲。但係和平手段,換嚟畀中國內地留學生包圍,呢啲中國內地嘅學生甚至唱起國歌,佔攻連儂牆,寫上「香港是中國的」等嘅字句,有人又對和平聲援香港嘅人士叉頸。

另外,喺2020年7月,新南威爾斯大學喺佢哋嘅 Twitter 發表一篇批評中國對香港政策嘅文章,結果引來唔少親中共嘅中國留學生抗議。就算校方之後刪除咗篇文章,中國國有嘅環球時報仍然唔滿意,甚至聲稱同校方談判,要求道歉。而呢個做法亦引起澳洲本地關注,其中工黨參議員托尼 謝爾頓(Tony Sheldon)就質疑,大學咁樣做點樣仲配自稱做大學,而外交政策雜誌(Foreign Policy)副主編詹士帕爾默(James Palmer)亦批評校方細膽怕死。

                                     

2.4. 相關議題 干預大學教師評分自主

2020年11月,澳洲SBS同澳大利亞人報報道,雪梨大學收到唔少有組織進行嘅聯署投訴,就學科同埋評核作業過程投訴教職員。報道提及,有啲公司刊登中文廣告,聲稱可協助利用「群眾力量」推翻唔合格嘅成績。報道又指,呢啲廣告同領航教育旗下嘅移民服務中介「Monkey King」有關。前香港立法會議員羅冠聰就喺社交網站指問題嚴重,批評呢啲手段係集團式批鬥。

                                     

2.5. 相關議題 武漢肺炎期間留學生經歷

喺武漢肺炎期間,全球好多國家都實施咗唔同嘅入境限制措施。喺2020年2月,澳洲宣布唔畀從中國飛抵澳洲嘅人入境(公民、永久居民同埋兩者嘅直系親屬,機組人員例外),而呢個禁令之後一直延長,但由於多數大學已經喺二月中陸續開學,令到好多喺假期返咗中國嘅在澳留學生深受影響,對澳洲政府抗議。佢哋關注,好多學術網站會因為中國政府進行網絡審查而實施嘅防火長城,令佢哋需要翻牆先上到,部分學科仲有好多實驗,無可能單用視頻遠程教學進行。有啲學生仲批評,澳洲對佢哋種族歧視,又話自己向澳洲政府貢獻好多錢,覺得自己被背叛。不過,呢啲中國內地學生嘅言論,就畀部分網民批評,話佢哋唔顧人命同健康。

另外,亦有一啲中國內地學生為咗闖關返返去澳洲,講大話話自己來自香港。

                                     

2.6. 相關議題 試卷用中文作答嘅爭議

喺2020年12月,雪梨大學有人揭發,有多過一科嘅考試收到少量用中文作答嘅試卷。校方聲稱有啲同學瀏覽器上嘅翻譯軟件自動將英文答案翻譯為中文,為咗確保校內所有學生唔會因為武漢肺炎疫情,喺學業上處於不利,將啲答案翻譯返做英文而評分,但就有學生批評呢個做法匪夷所思,對嗰啲英文唔好但係仍然用英文作答嘅同學唔公平。

                                     

2.7. 相關議題 參與當地遊行後家人被中國政府恐嚇

澳洲國會針對「外國政府干預大學領域」嘅調查期間,人權觀察組織(Human Watch)向調查委員會咗一份證據,顯示身處澳洲嘅中國留學生因為驚中國政府,而越來越唔敢喺政治敏感議題上發聲。佢哋表示曾經採訪約50名來自香港同中國大陸嘅學生,當中有一部份人遭受過騷擾同恐嚇。例如,佢哋喺澳洲參加支援香港民主運動遊行後遭到針對,有學生話,有其他澳洲國內華人社區嘅成員,威脅會將佢哋嘅行動向中國領事館匯報。