上一页

ⓘ 仔 係一個好多用途嘅字,可以係用喺輩份,可以用喺比自己細嘅人,亦都可以形容細嘅嘢,亦可以講一類人,林林種種;但如果講人嘅時候,一般嚟講都會係用喺男性嘅身上,好似 ..




                                               

靚仔

靚仔 可以係: 想做生意嘅人對潛在男人客嘅叫法,例:「靚仔,今日啲菜好靚呀。」 形容男仔,好有型、英俊、瀟灑。 白飯一碗:喺港式茶餐廳入面噉叫。

                                               

腸仔包

腸仔包 係香港嘅一種特色麵包,類似熱狗,但無醬汁。基本上喺香港大部份嘅麵包店都有得賣,但麵包嘅大細各有唔同,同時亦有唔少變種。而一般價錢由港幣4至7蚊不等。因為價錢平,唔少市民都會以腸仔包做早餐。

                                               

龍蝦仔

龍蝦仔 (Crayfish),又叫 小龍蝦 、 淡水龍蝦 ,係十足目下面一類淡水蝦。呢隻品種個樣似海螯蝦多過似龍蝦。

                                               

褥仔

褥仔 (juk⁶ zai²),又叫 椅墊 (墊讀剪或典),或者英譯音 咕 (讀箍筍 Cushion),係個軟套,裏便塞咗啲軟、又濕濕碎嘅嘢,好似紙、羽毛、毛、布碎之類。可以坐喺度墊住,又或者跪喺佢上便,咁可以舒服啲。

                                               

                                               

石榴仔

石榴仔 係種香港新界圍村傳統小食,出面嗰層係糯米粉,入面再包花生或者綠豆蓉,揉成石榴形,攞去蒸熟。石榴仔多數係過年時嘅賀年食品,亦可以用喺祭祀場合。

                                     

ⓘ 仔

仔 係一個好多用途嘅字,可以係用喺輩份,可以用喺比自己細嘅人,亦都可以形容細嘅嘢,亦可以講一類人,林林種種;但如果講人嘅時候,一般嚟講都會係用喺男性嘅身上,好似後生嘅男性會叫佢做 男仔 ;但有好多情況都會用喺女性方面。

以下簡單咁介紹吓 「仔」 嘅各種用法:

                                     

1.1. 「仔」字用喺人身上 倫理關係

仔 如果單單咁用,通常係用喺下一代嘅男性;如果係屬於自己嘅男性下一代,親生嘅骨肉會叫 親生仔 ,之不過唔理係親生嘅抑或領養或者再婚配偶嘅仔都好,其實都一律叫做 仔 ,稱呼可以叫 「仔仔」 、 「阿仔」 。如果個仔係屋企入面嘅長子,會叫 「大仔」 ,如果係最細嘅,會叫 「細仔」 或者 「孻仔」 。

如果覺得一個冇親屬關係嘅後輩好得歡心好想當佢係親生仔咁愛護,可以上契認佢做 契仔 ;有啲老豆第一次帶個仔見朋友嘅時候,會同啲朋友介紹話:「呢個係我嘅 乞兒仔 」,用法等於寫出嚟嘅「犬兒」,係屬於謙虛嘅介紹方法,並唔係話個仔真係做乞兒。

當一個男人好食懶非,剩係識洗屋企嘅錢,成日玩唔做嘢,咁呢啲就叫做 敗家仔 。

有啲人偷偷喺外面同第二個女人生咗個仔,咁呢個仔就會俾人叫做 油瓶仔 。

用於倫理關係嚟講,有時倒返轉唔係細過自己嘅其實都用得,通常用嘅會係舅父,如果佢嘅年紀其實都唔係大自己好多,可能相差只係十年八年或者更少(可能婆婆好遲先生佢出嚟),咁做後輩嘅可以叫佢做 舅父仔 。之不過唔係話乜關係都可以隨便加個 仔 字落去,例如唔會有人話:「姨丈仔」、「叔叔仔」(最細嘅阿叔可以叫「孻叔」)、「伯父仔」…,唔識而亂咁加隨時會變得好怪。

用喺平輩方面,如果老公叫老婆個細佬,會叫 舅仔 ,而老婆會叫老公個細佬做 叔仔 。平輩用喺女性方面,老婆個妹妹,做老公嘅會叫佢做 姨仔 ;而做老婆嘅就叫老公個妹妹做 姑仔 。

                                     

1.2. 「仔」字用喺人身上 其它

除咗輩份之外,用嚟形容人嘅重有好多例子,好似:

  • 戴眼鏡嘅會叫佢 四眼仔 ,呢個係來自兩塊鏡片加埋原本嘅一對眼而創作出嚟。
  • 矮嘅男仔會叫佢 矮仔 ,但相反又好少人會叫高嘅人做「高仔」。
  • 「 哥哥仔 」就通常係啲女性用嚟稱呼一啲未知叫咩名但係又想同佢溝通嘅男性,並唔係指佢哋嘅親生哥哥。
  • 用喺女性嘅話,除咗會叫一啲年紀比較輕嘅做 女仔 之外,一啲口花花嘅男人會叫啲女做 姐姐仔 或者 妹妹仔 。
  • 男性嘅嬰兒會叫 孲 子 ;
  • 成日出嚟玩,不務正業兼且搞三搞四嘅青少年,會俾人叫做 飛仔 或者 死飛仔 。香港名導演王家衛有套戲叫做阿飛正傳,另外有一套由幕後制作人向華強少有出嚟做主角嘅一套藍江傳之反飛組風雲,都係講舊時代關於呢類青年嘅故事。有樣好得意嘅嘢,係話以前呢啲所謂 飛仔 都有一個習慣,就係經常袋住支 刀仔 出街,佢哋認為將支摺刀喺隻手度玩吓玩下係好有型嘅事,當遇到唔順超嘅人仲會喺佢哋面前 拋刀仔 ,將把刀喺兩隻手度拋嚟拋去,用嚟拋對方嘅浪頭靠嚇。
  • 其實一路以嚟好多人都會用人哋個姓或者個名後面加個 仔 字嚟稱呼平輩或者細過自己嘅男性,例如鄰居個仔叫阿明,可以叫佢 明仔 ,公司裏面一齊做嘢姓張嘅同事,可以叫佢 張仔 ,姓陳咪叫 陳仔 ;好似香港退役足球員丘建威,大家都鍾意叫佢做 丘仔 ,咁樣係會有多啲嘅親切感。
  • 而家啲講波佬鍾意形容啲落場表現好勇猛好有活力嘅球員做 生牯仔 。
  • 肥嘅男仔會叫佢 肥仔 ,但倒返轉就好少會話人「瘦仔」。
  • 當一個人做咗衰嘢時會俾人鬧做 衰仔 、 仆街仔 ;如果嗰個人做咗蠢事,就會叫佢做 傻仔 、 蠢仔 、 懵仔 、 白痴仔 、 低B仔 、 戇居仔 …等。
  • 以前舊時代啲人好鍾意用 花 仔 嚟形容啲初出茅蘆唔識世面嘅後生仔,後來會簡單咁叫 仔 ,如果睇佢唔順超會叫佢做 死 仔 。
                                     

2.1. 「仔」用喺其它地方 細小嘅嘢

形容一啲比較細嘅嘢,同埋一啲體形細小或者初出世嘅生物,都可以加個 仔 字落去,

  • 講其它比較細啲嘅嘢會有 蛋糕仔 、 腸仔 、 碗仔 、 碟仔 、 煙仔 、 丸仔 、 刀仔 、 旗仔 、 袋仔 、 船仔 、 車仔 (唔係講英超球會車路士足球會)…等等好多好多;
  • 好似細小嘅鳥類會統稱佢做 雀仔 ,重有其它動物好似 雞仔 、 豬仔 、 馬騮仔 …呢啲;植物都有例子,好似 蕃茄仔 、 芽菜仔 、 白菜仔 ;就連講國語嘅台灣都會用到個「仔」字,例如會叫細嘅蠔做 蚵仔 ;
  • 講細嘅人仔: 孲 子 。
  • 自從一套卡通片蠟筆小新喺香港播出之後,片中嘅主角小新將賓舟叫做 何B仔 ,呢個詞語隱晦得嚟又帶點天真,從此就喺坊間流傳通用。
                                     

2.2. 「仔」用喺其它地方 事情

用「仔」嚟形容事情都好多例子,好似:

  • 鐘仔 - 即係去幫襯一樓一鳳。
  • 通波仔 - 係關於一種做心臟手術嘅術語。
  • 啪丸仔 - 食藥丸形狀嘅軟性毒品(俗稱為「丸仔」)。
  • 賣豬仔 - 簡單啲嚟講其實即係販賣人口。以前外國人入侵中國嘅時代,啲外國商人會喺碼頭高調咁招募人手話搵人去外國掘金礦,又話好食好住,掘到金又會分到一份,包保發大財衣錦還鄉乜乜物物,其實就運啲應徵嘅人去外國做苦工做奴隸;呢班被搵笨嘅應徵者就叫做「俾人 賣豬仔 」。
  • 媾仔 - 去結識男性。
                                     

2.3. 「仔」用喺其它地方 用「仔」做名

  • 台灣歌手周渝民因為俾人覺得個樣生得英俊又有啲似細路仔咁,所以就幫佢起咗個外號叫 仔仔 。
  • 而家好多人會將唔同嘅軟性毒品畀個外號嚟分別佢嘅成份種類,好似有一粒粒咁容易啪入口嘅各種 丸仔 ,其它嘅好似 K仔 、 E仔 …等。
  • 喺香港有種好流行嘅小食叫做 雞蛋仔 ,係一塊用粉漿加蛋焗成,表面睇嚟好似好多突起嘅波波咁嘅餅,啱啱焗起嘅時候表面係少少脆,但係個心就軟軟哋,好受行街一族歡迎,因為味道唔差之外,肚餓重可以用嚟頂住檔先。
  • 有套美國卡通片,講幾個人細鬼大塞豆窿嘅故事,香港譯做衰仔樂園( South Park )。
  • 喺香港,位於香港島嘅北面有個地方叫 灣仔 ,喺南邊就有個地方叫 香港仔 ,九龍近九龍城嘅就有 九龍仔公園 ,而喺新界就有個地方叫 大網仔 ,另外喺離島區嘅長洲,有一個好出名嘅名勝叫做 張保仔洞 ,係以前一個橫行外海一帶嘅海盜 張保仔 掘出嚟嘅山邊洞穴,用嚟存放劫返嚟嘅金銀財寶,而今日呢個洞已經成為香港旅遊嘅景點之一。至於喺澳門,有個島叫 氹仔 ,連接住佢嘅其中一條大橋就係叫 氹仔橋 。
  • 一種叫做 牛仔布 (Denim)嘅布料帶畀全世界最受歡迎最多人着嘅便服褲,就係美國人發明嘅 牛仔褲 ,當然除咗造褲之外重會用佢嚟做其它嘢,好似 牛仔衫 , 牛仔袋 …等;呢度所講嘅 牛仔 ,其實係英文 COWBOY 嘅直譯。
  • 舊時香港房屋署屬下負責樓宇保養、檢查樓宇違規同埋發出清拆令嘅部門叫做 寮仔部 ,而家已經同地政總署合併。