上一页

ⓘ 泛泰民族 (粵拼: faan 6 taai 3 man 4 zuk 6 )係以壯侗語系 西南泰語支 (泰文、老撾文等)爲母語嘅人群。泰國人唔等同於泰族,老撾人唔等同於寮族,呢樣嘢請注意。呢版 ..




泛泰民族
                                     

ⓘ 泛泰民族

泛泰民族 (粵拼: faan 6 taai 3 man 4 zuk 6 )係以壯侗語系 西南泰語支 (泰文、老撾文等)爲母語嘅人群。泰國人唔等同於泰族,老撾人唔等同於寮族,呢樣嘢請注意。呢版講嘅泛泰民族若果冇特別指明嘅話,係包含埋寮族等族嘅。

                                     

1.1. 語源 泰/傣嘅語源

一般來講,泰/傣(Thai、 ไทย )呢個詞語係「自由」嘅意思。但呢個係俗說,現今有力嘅講法係中文古音嘅「大」係語源,由 ( ไท )。

呢個講法認爲,「大」呢隻漢字有「大人」呢個詞嘅用法,有「偉大高尚」嘅意味,然後佢轉化成「(唔係奴隸,而係偉大高尚嘅)自由人」嘅意味,就噉從「自由人」嘅意味度,喺泰國嘅語言度生出「人」、「自由」等意味。實際上,喺昔日嘅泰國有「你係邊度嘅泰( ไท )?」嘅用法,呢個用法使用喺非奴隸嘅人民之間。「泰」( ไท ;自由人)係明確區別於稱呼做「撻」( ทาส )嘅奴隸。之後呢個用語普及喺而家嘅泰國,成爲代表普遍泰國人嘅詞。

喺而家嘅泰國,「泰(Thai、 ไทย )」呢個詞語喺書面上有曖昧嘅重合意味,合埋咗「自由」同「泰國人」呢兩種意味。順便講聲,泰文 ไทย 呢個詞語嘅字母 ย 係個冇發音嘅文字,寫來係做裝飾,顯得個詞有梵文風格。呢個詞語喺梵文冇相應嘅詞。

                                     

1.2. 語源 老/寮嘅語源

老/寮(Lao、 ລາວ )係昔日用來冠以王族嘅名。呢個用法可見於清邁王統史(Chiang Mai Chronicle)同難府王統史(Nan Chronicle)。之後老/寮作爲貴族稱號嘅地位慢慢噉丟失,變成只係單純噉表示「人」嘅詞。當初亦都用「泰/傣」(thai、 ໄທ )噉樣嘅詞做「人」嘅意味,後來老族立國,因爲對泰族抱有反感,對於「泰/傣」嘅意味,變爲用「老/寮」嘅講法,老/寮固定做民族名。

之後,法國人來咗後,將老/寮表記爲Lao,接上複數詞尾做Laos(啲老撾人噉解)作爲國名。

                                     

2.1. 歷史 有關泰系諸族起源嘅講法

講到泰系諸族嘅起源,有以下講法。

阿爾泰山脈起源說

呢個講法話漢族侵入以前佢哋居住喺中國,6世紀時從阿爾泰山脈移動去印度支那半島。如威廉 C. 多德( William C. Dodd )泰民族,中國人嘅兄弟( The Tai Race, Elder Brother of the Chinese ;1923年)。

泰國起源說

呢個講法由解剖學者S.生韋展(S. Sangvichien)等主張,攞北碧府嘅班教( บ้านเก่า )遺蹟出土嘅先史時代人骨做比較,認爲泰人係起源喺而家嘅泰國。

東南亞島嶼起源說

由語言學者白保羅同E.西典化典( E. Seidenfaden )主張,呢個講法嘅根據係基於古壯侗語同印尼、爪哇呢啲南島語系有好近嘅關係。

南詔起源說

呢個講法話泰人起源自中國西南部嘅南詔。譬喻提希昂 第 拉古普希( Terrien de Lacouperie )撣族搖籃( Cradle of the Shan Race ,1885年)漢語以前嘅中國語言( The Languages of China before the Chinese ,1887年)。

中國南部起源說

呢個講法以新石器時代嘅考古資料爲根據,話泰人起源於長江南部到雲南一帶嘅地方。A.R.歌倫( A. R. Colhoun )、威廉 哲尼( William J. Gedney )、W.吉里德拿( W. Credner )等人提倡。

中國東南沿岸、臺灣起源說

呢個講法嘅根據係中國嘅福建、廣東、臺灣嘅原始南島語同古壯侗語有類似性。沙加爾、R.布蘭池( R. Blench )提倡。

當中最有力嘅係中國南部起源說。認爲佢哋起源喺廣西到越南一帶,6~7世紀時由於漢族進出當地,趕咗出去,移動去西南。另外,中國東南沿岸、臺灣起源說亦值得關注。據三谷恭之嘅語言年代學,古侗泰語存在喺4000~5000年前,從臺灣分化,移動去中國內陸、北越南,受孟高棉語族、漢藏語系影響,約1000年前成立而家嘅壯泰語。

                                     

2.2. 歷史 哀牢

前215年,因爲而家長沙地區嘅越人(泰系越人)受秦朝攻擊,越人於是南下,到而家雲南省保山市邊近新形成咗個城市國家。當時住喺華北嘅中國人(漢民族),受中華思想影響,將泰人以及其他南方諸民族稱呼做「南蠻」,泰族特別稱呼做「哀牢」。住喺華北嘅中國人就將呢個城市國家稱呼做 哀牢國 。古代嘅哀牢之地,就係而家中國西南部雲南嘅南部,至今嗰度仲居住住哀牢人嘅後裔,而家中文將泰國嘅寫做泰( taai 3 )族,雲南嘅加多人字邊,寫做傣( daai 2 )族,噉樣來區別。住響泰國嘅泰族將雲南傣族稱呼做 傣仂族 。甲良族亦被認爲係哀牢嘅後裔之一。傣族主要存在喺西雙版納同德宏呢兩個自治州。

前110年,西漢武帝派遣佛教經典調查團去印度,但哀牢國嘅國王唔準呢個使節團通過哀牢國,哀牢國同西漢嘅對立爆發。呢場對立持續咗約7年,前87年哀牢國滅亡。9年,哀牢嘅子孫趁住中國內亂,重新宣佈獨立,但佢持續得唔長,76年,東漢再次滅亡佢,喺佢國土度設置 永昌郡 。

                                     

2.3. 歷史 六詔國

之後嘅數世紀間,有關泰族嘅資料唔存在,對於呢段歷史係不明嘅,到7世紀時有六個勐( maang 5 )喺雲南嘅大理盆地建國。呢六個勐總稱 六詔 ,稱呼做六詔國。六詔中最大嘅勐係蒙舍詔,彝族嘅先祖烏蠻族領導住佢,對唐朝構築咗友好關係,喺建國當初就入贈貢品。580年,氐族(而家緬族)最後嘅王朝仇池畀隋朝開國皇帝楊堅攻打滅亡。而家認爲四散嘅氐族有部分入咗六詔嘅保護傘下。

                                     

2.4. 歷史 南詔王國

蒙舍詔喺729年得到強大嘅唐朝嘅援助,喺皮羅閣王嘅時代統一咗六詔,南詔王國建國。皮羅閣王死後,因爲佢嘅功績,唐朝贈佢王位「雲南王」。不過,南詔王國後來同吐蕃同盟,變得強大,同唐朝嘅友好關係開始逐漸崩壞,唐玄宗時代,楊國忠喺751年出兵6萬、754年出兵7萬分兩回同南詔王國交戰,但都以南詔王國嘅勝利終結。南詔王國嘅勢力慢慢增加,趁住安史之亂嘅混亂,吐蕃同南詔喺762年一時佔領唐朝首都長安。之後佢逐步攻掠呢啲地方:832年打驃人嘅驃國、858年打東京、863年打安南,將安南都護府收爲佢嘅領土。不過喺902年漢人權臣鄭買嗣搞政變,南詔王國滅亡。

                                     

2.5. 歷史 大理國

937年白蠻(而家嘅白族)嘅段思平建立咗大理國,係南詔嘅後繼國家,期間泰族收入佢嘅保護傘下。之後,泰族開始大移動,散去印度支那半島、緬甸、阿參(Assam)各地,開始形成勐。1044年,佢支配下嘅緬族侵入伊洛華迪(Irrawaddy)平原,建立蒲甘王朝。

                                     

2.6. 歷史 泰族南下

傣那族、黑腹老族 內文:希蘭王國、 蘭納王朝、 哲冬王朝、 交王國、 難王國、 同 帕丘王國

最早南下嘅係 傣那族 ,定居喺湄公河北部上游,638年 希蘭王國 (而家清盛)畀高棉人(而家柬埔寨人)嘅羅渦王國統治,羅渦王卡拉華那迭(Kalavarnadit)命令希蘭王榮 普叻沙(Vieng Prueksa)接受佢任命嘅王。1259年,因爲蒙古帝國嘅雲南大理遠征,希蘭王子孟萊建立咗蘭納王朝,建設新首都清邁。

黑腹老族講嘅話係種類似老撾文嘅泰語方言,有獨自嘅文字,因爲舊日風習係喺肚度用墨紋身,所以稱呼做黑腹老族。佢哋係西北泰人,或者稱呼做傣那。蘭納王國持續咗數百年,後來做咗曼谷王朝(而家嘅泰王國)嘅屬國,之後完全變做泰國嘅領土。黑腹老族幾乎畀曼谷王朝嘅小泰族完全同化,而家稱呼做西北泰人,無咩特別嘅區別。

撣族、阿洪族、坎底傣 內文:景洪王國、 撣國、 棉散王朝、 扁也王朝、 沙間王朝、 阿華王朝、 孟卯、同 阿洪王國

1180年 傣仂族 從 傣那族 嘅 希蘭王國 度獨立,景洪王國興起。

以稻作爲生計嘅泰人必須沿住條河生活,有一群人進出緬甸嘅撣邦,形成喺薩爾溫江流域、稱呼做撣族( ไทใหญ่ )嘅民族。撣族喺中國併入傣族,作爲分支稱呼做大傣。

撣族群體嘅一部分越過巴坎山,開始生活喺印度東北部阿參邦嘅布拉馬普特拉河流域。佢哋就稱爲阿洪族或者 坎底傣 ,係印度嘅泰系民族。而家佢哋印度化咗,冇保留作爲泰族嘅原形。

老族 內文:勐騷瓦、 南掌、 萬象王國、 瑯勃拉邦王國、 占巴塞、 同 川壙王國

定居喺湄公河流域嘅居民有支向東移居,呢支民族即係老族,佢哋立嘅國即係而家嘅老撾。呢群人相對下文講到嘅小泰族,冇表現出同化傾向,固執頑強噉守住老族啲嘢,形成同泛泰民族相似而獨特嘅特徵。呢個亦係之後作爲相同民族但仲係形成老撾國嘅要因。自入咗近代以來,老撾政府好驚泰系、非泰系嘅少數民族會成爲老族嘅反抗勢力,於是定義保有老撾國籍者就係老撾人,喺政治上否定少數民族,作爲老撾人究竟係老族定其他少數民族呢件事佢唔做分類。

齊族 內文:泰族自治區、 儂族、 土族 越南、 同 齊族 依善人 內文:依善史

老族亦居住喺湄公河嘅西南部,但由於泰國嘅曼谷王朝同老撾嘅戰爭,呢個地方(依善)變咗做泰國領土。之後,呢個地方嘅老族區別於老撾人,嗌做依善人。依善人因爲惡劣嘅氣候而貧窮,加上講啲話唔同,受到咗來自泰王國小泰族嘅差別對待,傳統上佢哋嘅老族意識好強,近來由於中央政府嘅開發,加埋全球化影響下行進嘅一體化,後生嗰趟同都市嘅人佢哋嘅泰國人意識高咗。

暹羅人、小泰族 內文:泰國史、 素可泰王朝、 大城王朝、 吞武里王朝、 同 曼谷王朝

小泰族,外國人稱暹羅人。佢哋係由於蒙古帝國嘅雲南大理遠征而南下,將湄南河下游原先住落嘅高棉人(而家柬埔寨人)趕走,1238年(泰國佛曆1781年)建立素可泰王國。呢群泰人畀非泰系民族稱呼做暹羅(Siam,暹,粵音 cim 3 )。呢個素可泰王國係現今泰國嘅基礎。之後一個稱呼做泛泰民族主義嘅同化政策喺泰國行進,將泰國領土內嘅泰國國籍保有者定義爲泰國人,喺政治上否定泰系、非泰系少數民族。



                                     

2.7. 歷史 泛泰民族主義同歷史認識

上述歷史喺泰國教嘅歷史教育內容中基本一致,但喺而家嘅研究中,泰族南下以前嘅歷史有好多問題。

19世紀末,拉瑪五世時代嘅內務相丹龍親王搞曼谷改革,歷史教育作爲民族教育嘅一環策定咗落來,入到20世紀,二戰之前嘅披汶政權搞嘅愛國民族主義教育固定出而家嘅形態。喺泛泰民族主義嘅歷史觀中,諸如阿爾泰山脈學說等19世紀當時歐洲研究者提倡嘅假說都引入咗。

古蜀嘅民族系統不明,哀牢相比係壯侗系,更可能係藏緬系。喺19世紀開始嘅泰國歷史教育中,南詔講成係泰民族第一個獨立國家,但南詔嘅統治層係藏緬系嘅彝族,佢嘅後繼國家大理亦係藏緬系嘅白族。泰人早就居住喺嗰度,更可能係作爲佢哋保護傘下嘅一個民族。

                                     

3. 中國傣族

內文:傣族

以下顯示嘅係自1953年開始使用嘅中國泰語民族(傣族)分類,分類爲7個主要族羣。緬甸同泰國將傣那(Tai Nüa)分類爲撣族。

                                     

4. 睇埋

  • 緬甸人(緬族)
  • 傈僳族
  • 元音附標文字,包含各門泰語文字嘅文字體系
  • 僚人
  • 中國少數民族
  • 撣族
  • 拉祜族
  • 泰族自治區
  • 哈尼族